Landakort.is er vefgátt fyrir landfræðilegar upplýsingar á Íslandi, ætluð öllum þeim sem þurfa að finna efni um landfræðileg gögn og tengd málefni á veraldarvefnum. Gáttinni er ætlað að vera vettvangur fyrir upplýsingamiðlun um landfræðilegt efni, en einnig farvegur fyrir skrif um stöðu landfræðilegra/landrænna gagna og tengdra málaflokka. Eigandi og ábyrgðarmaður landakort.is er Þorvaldur Bragason landfræðingur og upplýsingafræðingur. Hann hefur starfað lengi á þessum vettvangi, fyrst um eins árs skeið hjá Landsbókasafni Íslands, þá í aldarfjórðung hjá Landmælingum Íslands, lengst af sem deildar- og sviðsstjóri og gegndi síðan um 15 ára skeið starfi gagnastjóra og verkefnisstjóra landupplýsinga á Orkustofnun, þar til hann fór á eftirlaun haustið 2022.

Efni vefgáttanna landakort.is og kortasafn.is, sem birtust fyrst á veraldarvefnum árið 2007 var á árinu 2015 steypt saman og varð þá aðgengilegt á einum stað á vefslóðinni landakort.is. Vefgáttinni kortasafn.is var upphaflega ætlað að vekja athygli á málefnum safna sem geyma landfræðileg gögn á Íslandi og tók vefgáttin landkönnun.is við því hlutverki árið 2018. Síðar hafa bæst við tilraunaverkefni um þrjár kortasjár: Vefkortasafnið, Sérkortasafnið og Loftmyndasafnið.

Kort, loftmyndir, gervitunglagögn, stafræn kortagögn og svæðistengd töluleg gögn eru dreifð um allt samfélagið. Skrár yfir söfnin eru ósamræmdar og fáar birtar á netinu, auk þess sem mörg söfn eru geymd við ófullnægjandi aðstæður. Samhæfð skráning, öruggari varðveisla og aukin vefbirting er nauðsynleg til að bæta megi aðgengi að upplýsingum.

Á landakort.is birtast pistlar um landræn gögn og tengd málefni. Þessum pistlum er meðal annars ætlað að auka umræðu um bætt vefaðgengi, ítarlegri skráningu og meira öryggi við varðveislu landfræðilegra gagna hér á landi. Á landakort.is er áhersla lögð á að hafa beina tengla á forsíðu í íslenskar kortasjár og vefsíður sem þægilegt er að hafa beinan aðgang að um leið og vefgáttin er opnuð. Þá er eitt af markmiðunum að hvetja til þess að íslensk stjórnvöld móti varðveislustefnu fyrir þennan málaflokk, en landrænn menningararfur Íslendinga er mjög dreifður, heildarumfang er ekki þekkt og engin heildarstefna til um skráningu, aðgengi og varðveislu hans.

Tæknilegur bakhjarl við landakort.is er Garðar Garðarsson hjá Veftorg.is.

Nánari upplýsingar um landakort.is og þá stefnu sem lagt er upp með við framsetningu efnis, fást með því að senda tölvupóst á thbr (hjá) centrum.is. Þangað má einnig senda ábendingar um efni vefgáttarinnar eða koma á framfæri sjónarmiðum í tengslum við efni birtra pistla.